Министрлер Кабинети мамлекеттик мүлктү менчиктештирүүнүн тартибин өзгөртүп, аны сатуунун ыкмаларын кыскартууну жана бир катар жол-жоболорду жөнөкөйлөтүүнү пландап жатат. Тиешелүү мыйзам долбоору Жогорку Кеңештин кароосуна киргизилди.

Негиздеме-маалымкатта айтылгандай, өзгөртүүлөр мамлекеттик менчикти ажыратуу жол-жоболорун жөнөкөйлөтүүгө, менчиктештирүүнүн ачык-айкындуулугун жогорулатууга жана инвестиция тартуу үчүн жагымдуу шарттарды түзүүгө багытталган.

Негизги өзгөртүүлөрдүн бири — менчиктештирүү ыкмаларын кыскартуу. Учурда мыйзамда мүлктү аукцион жана конкурс аркылуу сатуу, кийин сатып алуу укугу менен башкарууга же ижарага берүү, чарбалык коомдордун уставдык капиталына салым катары киргизүү, акцияларды биржа аркылуу сатуу жана башка механизмдер каралган.

Бул тизмеден конкурс аркылуу сатууну, кийин сатып алуу укугу менен башкарууга берүүнү жана кийин сатып алуу укугу менен ижарага берүүнү алып салуу сунушталууда. Иштеп чыгуучулар муну аталган механизмдерди колдонууда коррупциялык тобокелдиктердин жогору болушу менен түшүндүрүшөт. Негиздеме-маалымкатта учурда бул ыкмалар иш жүзүндө колдонулбай турганы белгиленген.

Мындан тышкары, менчиктештирүү боюнча атайын комиссияларды түзүүдөн баш тартуу сунушталууда. Учурда мындай комиссиялар документтерди жана мамлекеттик ишкананын финансылык-экономикалык абалын талдап, түзүлүп жаткан акционердик коомдун уставдык капиталынын өлчөмүн аныктайт жана зарыл болгон учурда кайра уюштуруу боюнча сунуштарды даярдайт. Иштеп чыгуучулар бул механизмди ашыкча деп эсептешет, анткени мүлктү баалоо менен адистештирилген баалоочу уюмдар алектенет.

Дагы бир өзгөртүү сатып алынуучу мамлекеттик мүлк үчүн төлөмгө байланыштуу. Мыйзам долбоорунда бөлүп төлөөгө уруксат берүү сунушталууда: алгачкы төлөм объекттин сатуу баасынын кеминде 50 пайызын түзүшү керек, ал эми калган сумманы бир жылдын ичинде төлөөгө болот.

Ошол эле учурда соода-сатыктын ачык-айкындуулугун күчөтүү каралууда. Алдыда боло турган сатуу тууралуу маалымат ыйгарым укуктуу мамлекеттик органдын расмий сайтына жана мамлекеттик электрондук кызмат көрсөтүүлөр порталына сатууга чейин кеминде 30 күн мурда жарыяланышы керек. Эгер стратегиялык объекттер жөнүндө сөз болсо — кеминде 90 күн мурда. Менчиктештирүү боюнча бүтүмдөрдүн жыйынтыгы бүтүм түзүлгөндөн кийин бир айдын ичинде жарыяланышы керек.

Мындан тышкары, стратегиялык объекттер үчүн кошумча көзөмөл каралган: мыйзам долбоорунда көрсөтүлгөн учурларда аларды ажыратуу Жогорку Кеңеш менен макулдашуу аркылуу жүргүзүлүшү керек.

Долбоордун авторлору өзгөртүүлөр коррупциялык тобокелдиктерди азайтуу, менчиктештирүүнүн ачык-айкындуулугун жогорулатуу жана ага жергиликтүү бизнести да, тышкы инвесторлорду да тартуу зарылдыгы менен байланыштуу экенин белгилешет.

Ошентип, мыйзам долбоору менчиктештирүү механизмин жалпысынан жөнөкөйлөтүүнү көздөйт: анын ыкмалары азаят, комиссияларды жоюу жана сатып алуучуларга бөлүп төлөө мүмкүнчүлүгүн берүү сунушталууда. Ошол эле учурда соода-сатыктын ачыктыгына коюлган талаптарды жана стратегиялык объекттерди ажыратууга көзөмөлдү күчөтүү каралууда.