Кыргызстандын Соода-өнөр жай палатасы ата мекендик өндүрүшчүлөрдүн улуттук брендин илгерилетүү механизмин бекитти. Анда «Кыргызстанда жасалган» товардык белгисин берүүнүн тартиби каралган. Бул тууралуу мекеменин басма сөз кызматы билдирди.

Тиешелүү отурумдун жүрүшүндө төмөнкү документтер кабыл алынган:

• «Кыргызстанда жасалган» товардык белгисин пайдалануу укугун берүүгө арыздарды кароо боюнча жумушчу комиссия жөнүндө жобо;
• Товардык белгини колдонуу укугун берүү критерийлери жана тартиби;
• Өтүнмөлөрдү кароо жана белгини пайдаланууга укук берүү үчүн палатанын тарифтери.

Соода-өнөр жай палатасынын президенти Темир Сариев аталган палата «Кыргызстанда жасалган» белгисин колдонууга расмий укук берген жалгыз уюм экенин билдирген. Товардык белги патенттелген жана анда ак илбирстин сүрөтү камтылган.