Кыргыз Республикасы менен Катар Мамлекетинин ортосунда Ишкерлер кеңешин түзүү жөнүндө макулдашууга кол коюлду. Кеңеш эки тараптуу сооданы көбөйтүүгө, инвестиция тартууга жана долбоорлорду биргеликте ишке ашырууга багытталат.

Кыргызстандын Соода-өнөр жай палатасынын маалыматында, документке Доха шаарында өткөн Дүйнөлүк инвестициялык форумдун алкагында кол коюлган. Жолугушууга КРдин Соода-өнөр жай палатасынын вице-президенти Авазбек Керимбаев жана Катардын Соода-өнөр жай палатасынын Директорлор кеңешинин төрагасынын биринчи орун басары Мохаммед бин Ахмед бин Товар Аль-Кувари катышкан.

Жыйында ошондой эле тараптардын ортосунда эки өлкөнүн Соода-өнөр жай палаталарынын өз ара түшүнүшүү жөнүндө меморандуму бекитилген.

Сүйлөшүүлөрдүн жүрүшүндө эки өлкө ортосунда соода-экономикалык жана инвестициялык байланыштарды өнүктүрүү, ошондой эле эки тараптын бизнес коомчулугунун кызматташтыгын кеңейтүү маселелери каралган.