Бишкек шаарынын Чүй проспектиси менен Ч. Валиханов көчөсүнүн кесилишинде курулуп жаткан жаңы көпүрөнү 2026-жылдын аягына чейин пайдаланууга берүү пландалууда. Бул тууралуу борбор калаанын мэриясы маалымдады.

Маалыматка ылайык, учурда объектиде көпүрөнүн тирөөчтөрүн орнотуу жана негизги конструкцияларын бетондоо иштери жүрүп жатат.

Долбоор боюнча көпүрө алты тилкелүү болуп, узундугу 90 метрди түзөт. Анын эки тарабына тең туурасы 3 метрден болгон жөө жүргүнчүлөр өтүүчү тротуарлар салынат.

Бишкек шаарынын мэри Айбек Жунушалиев аталган аймакка барып, курулуштун жүрүшү менен таанышкан. Шаар башчысы тиешелүү кызматтарга курулушту белгиленген мөөнөттө аяктоону жана иштердин сапатын камсыз кылууну тапшырган.