Кыргыз Республикасынын авиакомпаниялары 20 жылдан кийин Европа Биримдигине (ЕБ) учууларга тыюу салынган ташуучулардын тизмесинен чыгарылды. Бул тууралуу Европа Комиссиясынын Мобилдүүлүк жана транспорт боюнча башкы директораты билдиргенин КРдин Министрлер кабинети маалымдады.

Мындай чечим ЕБдин Учуулар коопсуздугу боюнча комитетинин (ASC) 2026-жылдын 19-21-майындагы жыйынында кабыл алынган. Кыргызстан аталган «кара тизмеге» 2006-жылы киргизилген болчу.

Өкмөт акыркы жылдары президент Садыр Жапаровдун тапшырмасы менен жарандык авиация тармагында реформалар жүргүзүлүп, учуулардын коопсуздугун көзөмөлдөө системасы ИКАОнун эл аралык стандарттарына шайкеш келтирилгенин билдирди.

“Европа Комиссиясы жетишилген прогрессти, анын ичинде техникалык кеңешмелердин, 2026-жылдын мартындагы баалоо сапарынын жыйынтыктарын жана Брюсселдеги ийгиликтүү угууларды жогору баалады. Жетишилген натыйжаларды колдоо үчүн Европа Комиссиясы кыргыз тарап менен техникалык өз ара аракеттенүүнү улантат”,- деп билдирди минкаб.