Кыргызстандын Ишенимдүү ишкерлери реестрине кирүү үчүн документтерди кабыл алуу башталды. Бул тууралуу Экономика жана коммерция министрлиги жарыялады.

Маалыматка ылайык, бул үчүн ишкер Соода-өнөр жай палатасына кайрылып, арыз тапшыруусу керек. Документтерди кабыл алуунун мөөнөтү 2025-жылдын 5-августунда аяктайт. Ишкерди аталган реестрге кошуу ишкердик субъекттерин тандоо боюнча туруктуу иштеген мекемелер аралык комиссиянын чечиминин негизинде жүргүзүлөт.

Реестрге киргизилген ишкерлер төмөнкү артыкчылыктарга ээ болушат:

• Мамлекеттик телеканалдар менен макулдашылган медиаплан боюнча медиаберүү үчүн акысыз эфирдик убакыт;
• Салык кызматтарынан кезексиз тейлөө;
• Кыргыз Республикасынын атынан эл аралык көргөзмөлөргө, жарманкелерге жана форумдарга акысыз катышуу;
• Кыргыз Республикасынын салык мыйзамдарына ылайык жүргүзүлгөн текшерүүлөрдөн тышкары, башка мамлекеттик көзөмөлдөөчү органдар тарабынан үч жылдык текшерүүдөн бошотуу (Реестрге киргизилген күндөн тартып);
• Мамлекеттик насыялоо программаларынын алкагында жеңилдетилген каржылоо мүмкүнчүлүгү.