VI Дүйнөлүк көчмөндөр оюндарынын алкагындагы көкпар боюнча турнирдин финалдык беттешинде Кыргызстандын курама командасы Казакстандын курамасын 7:2 эсебинде жеңип алып, мелдештин алтын медалына ээ болду.

Жалпысынан мелдешке эки тайпага бөлүнгөн жети курама команда катышты. Кыргызстан менен Казакстандын командалары тайпалык баскычта биринчи орундарды ээлеп, турнирдин финалына чыгышкан.

Казакстандын курамасы Астанада өткөн буга чейинки Оюндарда жеңишке жетип, бул турнирге азыркы чемпион макамында келген болчу. Бүгүнкү финалдын жыйынтыгы боюнча Кыргызстандын командасы алтын медалдарды багындырса, Казакстандын курамасы экинчи орунду ээлеп, күмүш байгеге ээ болду.