Бүгүн, 17-октябрда, Ереван шаарында Кыргызстандын президенти Садыр Жапаров Армениянын премьер-министри Никол Пашинян менен жолугушуп, сүйлөшүүлөрдү өткөрдү. Бул тууралуу президенттин басма сөз кызматы билдирди.

Сүйлөшүүлөрдүн алдында Еревандагы Президенттик сарайда Кыргызстандын мамлекет башчысын расмий тосуп алуу аземи болду. Анда эки өлкөнүн гимндери жаңырып, жетекчилер расмий делегациялардын мүчөлөрү менен учурашты.

Андан кийин мамлекет башчылар бетме-бет форматта сүйлөшүүлөрдү өткөрүп, Кыргызстан менен Армениянын ортосунда саясий диалогду өнүктүрүү, соода-экономикалык байланыштарды кеңейтүү жана биргелешкен долбоорлорду жүзөгө ашыруу маселелерин талкуулашты.

Мындан соң тараптар кеңейтилген курамда сүйлөшүүлөрдү өткөрдү. Анда соода-экономикалык байланыштарды кеңейтүү, транспорттук-логистикалык каттамдарды өнүктүрүү, ошондой эле айлана-чөйрөнү коргоо жана тоо экосистемаларын сактоо маселелери каралды.

Садыр Жапаров Никол Пашинянды 2027-жылдын октябрында Бишкекте өтө турган «Бишкек+25» экинчи глобалдык тоо саммитине катышууга чакырды. Ошондой эле ал Армениянын өкмөт башчысын Кыргызстанга расмий сапар менен келүүгө чакырды.

Өз кезегинде Никол Пашинян Садыр Жапаровдун Арменияга жасаган алгачкы расмий сапары эки жактуу мамилелердин жаңы барагын ачарын белгиледи.