Орусияда мончодо кармалган кыргызстандык 24 жарандын 20сы бошотулган. Ал эми 4 жаранга Орусиянын аймагынан чыгаруу боюнча чечим чыккан. Бул тууралуу Кыргызстандын Миграция министрлиги кабарлады.

Министрлик Москвадагы өкүлчүлүгү элчилик менен биргеликте бул кырдаал боюнча Орусиянын Түндүк административдик аймагынын ички иштер башкармалыгына кайрылышканын билдирди.

Эске салсак, 11-апрелде Москвадагы «Бодрост» мончосунда мигранттарга каршы тинтүү болгон. Ал жактагы ондогон мигранттардын көбү кыргызстандыктар болгон. Социалдык тармактарда тараган видеолордо укук коргоо органдарынын адамдары эркектерди сабап, бетин жерге тийгизип, жерге тизелеп басууга мажбурлап жатканын көрүүгө болот. Видео кыргыз сегментинде коомдук резонанс жаратты.