Нарын облусундагы Орто-Токой суу сактагычына 1,2 миллион даана май-канат балыгынын чабактары коё берилди. Бул тууралуу Суу ресурстары, айыл чарба жана кайра иштетүү өнөр жайы министрлиги билдирди.

Балыктандыруу иштерин “Орто-Токой ынтымагы” ишканасы ишке ашырды. Коё берилген чабактардын орточо салмагы 0,45 граммды түзөт. Процесске Балык өнөр жайы комплекси департаментинин адистеринен жана Экологиялык туристтик милициянын кызматкерлеринен турган комиссиялык топ көзөмөл кылды.

Иш-чара суу сактагычтагы балык запастарын көбөйтүүгө, биологиялык тең салмактуулукту сактоого жана балык чарбасын өнүктүрүүгө багытталган.