Ош облусунда өткөн коллегиялык жыйында аймактын 2025-жылдын биринчи жарым жылындагы социалдык-экономикалык өнүгүүсү талкууланды. Президенттин аймактык өкүлчүлүгү билдиргендей, жыйындын жыйынтыгында бир катар жетекчилердин ишине баа берилди.

• Ноокат районунун акими Э.А. Чакибаевдин иши өнөр жай продукциясынын көлөмү төмөндөгөндүгүнө байланыштуу жетишсиз деп табылды.
• Өзгөн районунун биринчи орун басары А.Р. Дүйшеевге инвестициялык карта жана стратегиялык пландын жоктугу үчүн эскертүү берилди.
• Араван районунун биринчи орун басары А.И. Ахматовго мамлекеттик тапшырмаларды аткарбагандыгы үчүн катуу сөгүш жарыяланды.

Ошондой эле билим берүү тармагындагы жетишпестиктер үчүн жети район (Алай, Араван, Кара-Кулжа, Кара-Суу, Ноокат, Өзгөн, Чоң-Алай) акимдеринин социалдык маселелер боюнча орун басарларынын иши жетишсиз деп табылды.

Мындан тышкары:

• Алты айыл өкмөт башчысынын,
• Бир шаар мэринин орун басарынын,
• Кара-Суу, Кара-Кулжа жана Өзгөн райондук билим берүү бөлүмдөрүнүн жетекчилеринин иши да жетишсиз деп бааланды.

Район жетекчилерине эскертүү берүү сунушталды.