Ош шаарында Суранчы Жетимишов көчөсүн Раззаков көчөсүнөн Ош көчөсүнө чейин оңдоо иштери башталды. Бул тууралуу Ош шаардык мэриясы билдирди.

Долбоорго ылайык, жолду оңдоо менен бирге эки тарабына тротуар, ирригациялык лотоктор орнотулуп, жашылдандыруу иштери жүргүзүлөт. Мурда бул көчө тар болгондуктан, жөө жүргүнчүлөр үчүн шарт каралган эмес.

Шаар мэри Жанарбек Акаев курулуш иштеринин жүрүшү менен таанышып, жумушту сапаттуу жана тез арада бүткөрүүнү тапшырды. Мэрдин айтымында, бул жолдун бүткөрүлүшү «Ош» эл аралык аэропортуна каттаган жүргүнчүлөргө тыгынсыз барууга шарт түзүп, шаардагы унаа агымын жөнгө салат.

Мэриянын маалыматында, учурда Ош шаарында бир убакта 16 көчө оңдолуп, жаңылоо иштери жүргүзүлүүдө.