Кыргызстандын президенти Садыр Жапаров биринчи айым Айгүл Жапарова менен бирге Корея Республикасына расмий сапар менен барды. Сеул шаарынын аэропортунан мамлекет башчысын Кореянын климат, энергетика жана экология боюнча биринчи вице-министри Ким Хан Сын жана башка расмий өкүлдөр тосуп алышты.

Сапардын алкагында Садыр Жапаров Кореянын жетекчилиги менен эки тараптуу сүйлөшүүлөрдү өткөрөт. Ошондой эле ал «Борбор Азия — Корея Республикасы» биринчи саммитине жана бизнес-саммиттин сессиясына катышат.

Бүгүн, 16-сентябрда, мамлекет башчысы Сеул шаарындагы Улуттук мемориалга барып, гүл коюу аземине катышты. Садыр Жапаров Кореянын көз карандысыздыгы үчүн курман болгондордун элесине таазим этип, мемориалдын коноктор китебине жазуу калтырды.