Кыргызстандын жарандарынын Казакстандын аймагына кирүү жана анда болуу тартиби өзгөрүүсүз калат. Бул тууралуу чек арадан өтүүнүн жаңы эрежелери жөнүндө тарап жаткан маалыматтарга байланыштуу КР Тышкы иштер министрлиги билдирди.

Мекемеден такташкандай, QazETA системасы учурда пилоттук режимде иштеп жатат. Азыркы этапта аны колдонуу Кыргызстандын жарандары үчүн милдеттүү болуп саналбайт.

«Кыргыз Республикасынын жарандарынын Казакстан Республикасынын аймагына кирүү жана анда болуу тартиби өзгөрүүсүз калат», — деп баса белгилешти ТИМден.

Миграциялык эрежелер өзгөргөн жана казак тараптан расмий маалымат келип түшкөн учурда, тышкы саясий мекеме жарандарга кошумча маалымат берерин кошумчалады.