Форумдун жыйынтыгы боюнча бир катар келишимдерге кол коюлуп, «Росатомдун» спикерлери ишкердик программага катышты.

2026-жылдын 6–7-августунда Ысык-Көл облусунун Бостери айылында өткөн VIII Кыргыз-Орус экономикалык форумунун алкагында «Росатом» мамлекеттик корпорациясы энергетика, инфраструктура жана энергетикалык коопсуздук боюнча тармактык сессияларга катышты.

Форум Евразия өкмөттөр аралык кеңешинин жыйынынын алкагында өттү. Иш-чарага Кыргызстан менен Орусиянын мамлекеттик бийлик органдарынын, бизнесинин, өнүктүрүү институттарынын жана эксперттик коомчулугунун өкүлдөрү катышты.

Форумдун биринчи күнүнүн жыйынтыгы боюнча бир катар келишимдерге кол коюлду. Алардын катарында Ысык-Көл облусунда биринчи шамал паркын куруу жана иштетүү долбоорун колдоо боюнча келишим бар. Ага «НоваВинд Кыргызстан» ЖЧКсы («Росатом» МКнын шамал энергетикалык дивизионуна кирет) жана Россия-Кыргызстан өнүктүрүү фонду кол койду. Долбоор үчүн алгачкы компоненттер Кыргызстанга жеткирилди.

Форумдун алкагында «Росатомдун» өкүлдөрү ишкердик программага катышты. «Росатом» мамлекеттик корпорациясынын Кыргыз Республикасындагы өкүлчүлүгүнүн башкы директору Дмитрий Константинов «Энергетика — экономикалык өсүштүн негизи» аталышындагы сессияга модераторлук кылды. Сессияда Кыргыз Республикасында энергетикалык долбоорлорду өнүктүрүү боюнча орус жана кыргыз тараптын көз караштары сунушталды.

«Санариптик суверенитет» сессиясына «Гринтех» ЖЧКсынын башкы директору Сергей Смирных спикер катары катышты. Катышуучулар Орусия менен Кыргызстандын санариптик суверенитетти калыптандырууга, жасалма интеллектти киргизүүгө болгон мамилелерин жана башка технологиялык аспекттерди талкуулашты.

Форумда ошондой эле жаштар багыты боюнча иштер жүргүзүлдү. Анда мамлекеттик корпорациянын атынан «Росатомдун» башкы директоруна караштуу Эл аралык жаштар консультациялык кеңешинин мүчөсү (Impact Team 2050) Бектан Кыдыев катышты.

«Росатом» Кыргызстандын жогорку окуу жайлары менен биргеликте билим берүү долбоорлорун улантып, адистердин квалификациясын жогорулатууну колдойт жана кадрларды даярдоого катышат.

«Форумдун башкы натыйжасы — Орусия менен Кыргызстандын кызматташтыгы ырааттуу жана конкреттүү өнүгүп жатканынын ырасталышы: келишимдерден — долбоорлорго, долбоорлордон — өлкөнүн экономикасы үчүн жаңы инфраструктурага жана жаңы мүмкүнчүлүктөргө. Бул — жаңы кубаттуулуктарды түзүү, энергобалансты диверсификациялоо, узак мөөнөттүү каржылоону тартуу жана энергосистеманын туруктуулугун бекемдөө дегенди түшүндүрөт. Биз Кыргызстан "Росатом" сыяктуу ири оюнчулар үчүн тартылуу борборуна айланып жатканына дагы бир жолу ынанып жатабыз. Бул оюнчулар "жашыл" энергетика долбоорлоруна — долбоорлоодон жана куруудан баштап, объектилерди иштетүүгө чейин инвестиция салууга даяр», — деп белгиледи «Росатом» мамлекеттик корпорациясынын Кыргыз Республикасындагы өкүлчүлүгүнүн башкы директору Дмитрий Константинов.