Президент Садыр Жапаров Малайзия Сенатынын төрага орун басары Нур Жазлан Мохамадды кабыл алды.

Президенттик Администрациянын маалыматында белгиленгендей, жолугушууда тараптар саясий, экономикалык, инвестициялык жана билим берүү тармактарында кызматташтыкты кеңейтүү маселелерин талкуулашты. Президент Кыргызстан Малайзияны Түштүк-Чыгыш Азиядагы маанилүү өнөктөш катары карай турганын жана өлкөлөр ортосундагы соода жүгүртүү өсүп жатканын белгиледи.

Малайзиялык өкүл парламенттер аралык достук тобун түзүү демилгесин көтөрүп, кызматташууну тереңдетүүгө кызыктар экенин билдирди.

Жапаров ошондой эле Кыргызстандагы экономикалык өсүш, инфраструктураны өнүктүрүү жана санариптештирүү багытындагы иштер тууралуу маалымат берди.