15-майда Кыргызстандын президенти Садыр Жапаров Түркстан шаарында өткөн Түрк мамлекеттеринин уюмунун (ТМУ) бейрасмий саммитине катышты. Иш-чаранын катышуучуларына Казакстандын президенти Касым-Жомарт Токаев салам жолдоду.

Саммиттин темасы — «Жасалма интеллект жана санариптик өнүгүү». Кесиптештеринин алдында сөз сүйлөгөн Садыр Жапаров бүгүнкү күндө глобалдык атаандаштык ресурстар жана аймактар үчүн гана эмес, технологиялык лидерлик үчүн да жүрүп жатканын баса белгиледи.

Кыргызстандын ийгиликтерине токтолуп, президент конкреттүү сандарды келтирди. 2026-жылы өлкөдө санариптик чөйрөнү өнүктүрүүнү жана жасалма интеллектти (ЖИ) колдонууну жөнгө салган Санариптик кодекс күчүнө кирген. Жарандар «Түндүк» мамлекеттик кызмат көрсөтүүлөр порталы аркылуу 195 кызматты онлайн ала алышат — акыркы беш жылда алар 67 миллион жолу колдонулган, анын ичинде 12 миллиондон ашыгы акыркы төрт айда гана ишке ашкан. Порталдын аудиториясы өлкөнүн 16 жаштан 55 жашка чейинки калкынын 80%ын камтыйт.

Садыр Жапаров ошондой эле санариптик каржы жана криптоиндустрия темасына токтолуп, Кыргызстан виртуалдык активдер рыногун өнүктүрүү үчүн укуктук базаны ырааттуу түрдө калыптандырып жатканын белгиледи жана бул чөйрөдө эл аралык кызматташтыкты кеңейтүүгө кызыкдар экендигин билдирди.

Сөзүнүн аягында президент кесиптештерин сентябрь айында Кыргызстанда өтө турган VI Дүйнөлүк көчмөндөр оюндарына чакырды.

Саммиттин алкагында Кыргызстандын, Азербайжандын, Казакстандын, Түркиянын жана Өзбекстандын лидерлери видеоконференция режиминде Түркстан шаарындагы «Түрк цивилизациясынын борборун» — санариптик жана интерактивдүү технологияларды колдонуу менен курула турган маданий-билим берүү комплексин курууга капсула салуу аземине катышышты.