Улуттук коопсуздук мамлекеттик комитетинде жетекчилик курамда өзгөрүү болду. Президенттин басма сөз кызматынын маалыматында, Уранбек Шадыбеков УКМК төрагасынын орун басары — Киберкоопсуздукту камсыздоо боюнча координациялык борборунун директору кызматынан бошотулду.

Анын ордуна аталган кызматка Алмаз Ажыгулов дайындалды. Тиешелүү тескемелерге өлкө башчы Садыр Жапаров кол койду.

Уранбек Шадыбеков орун басарлык кызматка ушул жылдын 10-февралында дайындалган эле. Ал эми 23-февралда президент ага «генерал-майор» жогорку аскердик наамын ыйгарган.