Мамлекеттик салык кызматынын төрагасы Алмамбет Шыкмаматов 6-февралдагы ведомствонун коллегиялык жыйынынын жүрүшүндө өлкөдөгү салык режимин жеңилдетүү боюнча 2025-жылы көрүлгөн чаралар тууралуу айтып берди.

Ведомство башчысынын айтымында, 2025-жылдын 1-январынан тарта бир катар негизги өзгөртүүлөр ишке ашырылган:

• ЭТТНди жоюу: товарлардын көпчүлүк категориялары үчүн электрондук товардык-транспорттук коштомо кагаздарды милдеттүү түрдө колдонуу талабы жоюлган.
• Текшерүүлөргө мораторий: базарларда текшерүү максатындагы сатып алууларды жүргүзүүгө жана рейдик салыктык контролго тыюу салынган.
• Отчеттуулукту жеңилдетүү: «нөлдүк» отчетторду тапшыруу милдети токтотулган.
• Декларациялоо: жеке ишкер болуп саналбаган жеке жактар үчүн жалпы салыктык декларация тапшыруу талабы жоюлган.

Алмамбет Шыкмаматов бул кадамдар бизнеске үнөмдөлгөн убакытты жана ресурстарды өз ишмердүүлүгүн түздөн-түз өнүктүрүүгө жумшоого мүмкүндүк бергенин баса белгиледи. Салык кызматынын жетекчисинин пикири боюнча, жол-жоболордун жөнөкөйлөшү жана административдик басымдын азайышы ишкерлердин натыйжалуулугун жогорулатууга жана жалпы Кыргызстандын экономикасын чыңдоого өбөлгө түзөт.