Чүйдүн Сокулук районунда жашылча өсүмдүктөрүнүн үрөнүн өндүрүү боюнча окуу-илимий борбору ачылды. Бул тууралуу Айыл чарба министрлиги билдирди.

Маалыматка ылайык, борбор Түштүк Кореянын колдоосу менен Кыргыз улуттук агрардык университетинин окуу-тажрыйба чарбасынын базасында түзүлдү.

Долбоор жашылчалардын үрөндөрүнүн түшүмдүүлүгүн жана сапатын жогорулатуу, өлкөнү туруктуу үрөн менен камсыз кылуу системасын түзүү, илимий изилдөөлөрдү өнүктүрүү жана агрардык тармакта дуалдык билим берүүнүн деңгээлин көтөрүү максатында ишке ашкан.