Бишкекте 10-13-ноябрда мектеп директорлору жана ата-энелер менен ведомстволор аралык жолугушуулар өттү. Алар жашы жете электер арасында укук бузуулардын алдын алууга жана балдардын коопсуздугуна арналды. Жолугушууларды мэриянын Билим берүү департаменти өткөрдү.

Ленин районунун ата-энелери менен жолугушуу 12-ноябрда «Таберик» балдар музыкалык театрынын залында өттү. Ага Бишкек мэринин орун басары Рахат Мусаева, райондук акимиаттын, прокуратуранын, ички иштер органдарынын, кайгуул милициясынын жана саламаттык сактоо тармагынын өкүлдөрү, ошондой эле мектеп директорлору жана ата-энелер катышты.

Адистер өспүрүмдөрдүн коопсуздугу, кылмыштуулуктун алдын алуу чаралары, психоактивдүү заттарды колдонуунун алдын алуу жана интернеттеги жүрүм-турум эрежелери тууралуу айтып беришти. Үй-бүлөдөгү ишенимдүү мамиле жана балдардын жүрүм-турумундагы өзгөрүүлөрдү өз убагында байкоонун маанилүүлүгү өзүнчө сөз болду.

№58 мектептин мугалимдери катышуучуларга тематикалык көрсөтүү тартуулашты.

Жолугушуунун аягында ата-энелер ведомстволордун адистерине суроолорун берип, мектеп менен үй-бүлөнүн өз ара аракеттенүүсү боюнча сунуштарын айтышты.

Жолугушуулар «Баланын коопсуздугу – ата-эненин жоопкерчилиги» деген ураан менен өттү.