Каракол шаардык соту 26 жаштагы Абдилдин (аты редакция тарабынан өзгөртүлдү) кылмыш иши боюнча чечим чыгарды. Бул тууралуу аталган шаардык соттон кабарлашты.
Окуя Каракол шаарынын Кашка-Суу кичи районунда, ушул жылдын 16-июнунда саат 20:30 чамасында өзүнүн үйүндө катталган. Анда мурунку аялы менен уруша кетип, ал жыгылып кеткенде, анын башына тепкилеген деген айып коюлган.
Сотто айыпталуучу өзүнүн күнөөсүн мойнуна албай, мурунку жубайын түртүп жибергенин гана айткан.
Жабырлануучунун айтымында, алар жарым жыл гана бирге жашашкан жана аны күйөөсү мурда дагы ур-токмокко алган.
Натыйжада, сот аны күнөөлүү деп таап, коомдук жайларда 40 саат иштөө чечимин чыгарган.
