Чүй облусундагы сууурлардан чума жана башка кооптуу жугуштуу оорулардын белгилери аныкталган жок. Мындай жыйынтыкка социалдык тармактарда жаныбарлар арасында мүмкүн болгон оору тууралуу маалымат тарагандан кийин түзүлгөн ведомстволор аралык комиссия келди.

Комиссиянын курамына Жаратылыш ресурстары, экология жана техникалык көзөмөл министрлигинин, Ветеринардык кызматтын, Кыргыз Республикасынын Улуттук илимдер академиясынын жана башка мамлекеттик органдардын өкүлдөрү кирди.

Адистер сууурлардын популяциясына визуалдык байкоо жүргүзүштү. Текшерүүнүн жыйынтыгында жаныбарлардын абалы канааттандырарлык экени, ошондой эле жугуштуу оорулардын белгилери аныкталбаганы белгиленди.

Жаратылыш ресурстары министрлиги Чүй облусунда буга чейин чуманын табигый очоктору катталбаганын да билдирди.

Министрлик Кыргызстанда өзгөчө кооптуу жугуштуу ооруларга туруктуу мониторинг жүргүзүлөрүн эске салды. Ысык-Көл, Нарын, Ош жана Талас облустарында чумага каршы станциялар иштеп, табигый очокторго байкоо жүргүзүп, алдын алуу иш-чараларын жүргүзүп келет.