Жаратылыш ресурстары министрлигинин Ош регионалдык башкармалыгы «Кыргыз-Ата» мамлекеттик жаратылыш паркынын аймагын учкучсуз учуучу аппараттардын (дрондордун) жардамы менен көзөмөлдөй баштады. Заманбап дрондор экологиялык мыйзам бузууларды каттоого алуу үчүн корук аймагында күзөт жүргүзүүдө.

Инспекторлор абадан реалдуу убакыт режиминде таштандылардын белгиленбеген жерлерге ташталышын, эс алуучулар тарабынан өрт коопсуздугунун сакталышын жана башка мыйзамсыз аракеттерди көзөмөлдөп жатышат. Ведомстводон жаратылышты коргоо талаптарын бузгандарга катуу административдик айып пулдар салынарын эскертишет.

Мындан тышкары, «Кыргыз-Ата» паркында тартипти камсыз кылуу үчүн учурда жаңы кире бериш арка жана көзөмөл-өткөрмө пункту курулуп жатат. Жаңы өткөрмө бекети унаалардын киришин иретке келтирип, сейрек кездешүүчү жан-жаныбарлар менен өсүмдүктөр дүйнөсүн (флора жана фаунасын) сактоо боюнча көзөмөлдү кыйла күчөтөт.