Үстүбүздөгү жылдын 15-сентябрына карата ар түрдүү миграциялык мыйзамдарды бузгандыгы үчүн Кыргызстандын 72 миң 739 жараны Орусиянын көзөмөлдөгү адамдардын реестрине киргизилген. Бул тууралуу Кыргызстандын Тышкы иштер министрлиги Орусиянын Ички иштер министрлигинин маалыматына таянып билдирди.

Маалыматка ылайык, Кыргызстандын 39 миң 96 жараны Орусиянын аймагынан чыкпастан, миграциялык органдарга кайрылуу жолу менен өзүнүн укуктук абалын жөнгө салган. Мындан тышкары, 84 миң 86 жаран аталган реестрден Орусиядан өз алдынча чыгып кеткенине байланыштуу чыгарылган.

Жалпысынан 1-январдан 10-сентябрга чейин көзөмөлдөгү адамдардын реестринен болжол менен 123 миңге жакын кыргызстандык жаран чыгарылган.