«Кыргызстандын аэропорттору» ААКсы эки ири долбоордун алдын ала баасын жарыялады. «Манас» эл аралык аэропортунун аэровокзал комплексин реконструкциялоого болжол менен 130 млн доллар, ал эми «Жалал-Абад» жаңы аэропортун курууга 60 млн доллардай каражат жумшалат. Акыркы суммалар иштер аяктап, каржылык эсептөөлөр бүткөндөн кийин аныкталат.

«Манас» аэропорту боюнча көрсөтүлгөн суммага аэровокзалды реконструкциялоо, учуп-конуу тилкесин капиталдык оңдоо жана ага байланыштуу инфраструктураны модернизациялоо кирет. Ал эми «Жалал-Абад» аэропортуна бөлүнгөн 60 млн долларлык суммага долбоорлоо иштери, кошумча иштер жана учуп-конуу тилкесинин курулушу да кирет.. Иштер уланып жаткандыктан, эки көрсөткүч тең азырынча алдын ала эсептелген баа болуп саналат.

Компания чыгымдар тууралуу Евразия өнүктүрүү банкынын (ЕӨБ) материалдарында эки долбоордун жалпы наркы 770 млн доллар деп көрсөтүлгөндөн кийин түшүндүрмө берди. «Кыргызстандын аэропорттору» бул сумманы ашыкча деп эсептейт жана бардык иштер аяктап, акыркы эсептөөлөр жүргүзүлгөндөн кийин да эки аэропортко кеткен чыгымдар бул көрсөткүчкө жетпей турганын билдирүүдө.

Компания ошондой эле так эмес маалыматтар коомчулукта жарандык авиацияны өнүктүрүүгө багытталган каражаттардын көлөмү жана максаттуу пайдаланылышы тууралуу туура эмес түшүнүк жаратарын белгиледи. Уюм ири мамлекеттик долбоорлордун каржылык көрсөткүчтөрүн жарыялоодо жоопкерчиликтүү мамиле кылууга чакырды.