Кыргызстандын Министрлер кабинетинин төрагасынын орун басары Эрлист Акунбеков Транспорт жана коммуникациялар министрлигине президент тарабынан коюлган милдеттерди, анын ичинде жол тармагын өнүктүрүү боюнча тапшырмаларды өз убагында аткарууну тапшырды. Бул тууралуу Министрлер кабинетинин басма сөз кызматы билдирди.

Маалыматка ылайык, транспорт министри Талантбек Солтобаев министрликтин иши, анын ичинде республикалык маанидеги жолдордун курулушу, бюджеттик каражаттардын колдонулушу, маалыматтык системаларды санариптештирүү, ошондой эле пландар жана көйгөйлүү маселелер боюнча отчёт берди.

2021–2025-жылдары жол тармагын республикалык бюджеттен каржылоо эки эсеге өскөнү белгиленди. Муну менен катар жолдорду куруу жана оңдоо иштеринин темпи да жогорулады.

Министрликтин маалыматы боюнча, 2021–2025-жылдары 3 684,2 чакырым жолдун курулушун бүтүрүү пландалууда, анын ичинен 1 545 чакырымы 2025-жылы бүткөрүлөт. 2026-жылы мекемеге бекитилген бюджеттин алкагында 1 500 чакырымдан ашык жолду куруу жана оңдоо тапшырылды.

Учурда өлкө боюнча 30га жакын ири инфраструктуралык долбоорлордо пландуу иштер жүрүп жатат.

Акунбеков үстүбүздөгү жылы Кыргызстанда Шанхай кызматташтык уюмуна мүчө мамлекеттердин башчыларынын саммитин, ошондой эле Дүйнөлүк көчмөндөр оюндарынын өткөрүлүшү пландалып жатканын белгиледи. Буга байланыштуу ал жол инфраструктурасы долбоорлорун өз убагында жана сапаттуу ишке ашырууну камсыздоону тапшырды.

Ошондой эле ал президент Садыр Жапаров Ош облусунун тургундары менен жолуккан учурда көтөрүлгөн жол көйгөйлөрүн ыкчам чечүү зарылдыгын эске салды.

Мындан тышкары, жайкы туристтик сезондун башталышына карата жолдорду ачуу жана кеңейтүү, ошондой эле жол жээктерин иретке келтирүү иштерин активдештирүү тапшырылды.