Кечээ, 13-июлда Ысык-Көл облусунун Ак-Суу районунун Челпек айыл өкмөтүнүн Бурма-Суу айылында нөшөрлөп жааган жаандын кесепетинен чогулган сел каналдарга батпай, турак үйлөрдүн королорун жана ички чарбалык жолдорду каптаган.

Өзгөчө кырдаалдар министрлигинин маалыматына караганда, жерине Ак-Суу райондук Өзгөчө кырдаалдар бөлүмүнөн 2 офицер, Каракол шаардык №15 өрткө каршы куткаруу бөлүмүнөн 4 куткаруучу тартылып, мотопомпа жана башка атайын шаймандар менен сууларды сордуруп тазалоо иштери жүрүүдө. Ошондой эле Челпек айыл өкмөтүнөн 1 даана МТЗ-82 экскаватору тартылып, каналдардын жээктерин бекемделип жатат.