Иликтөөчү журналист Болот Темиров Россияга жөнөтүлдү. Бул тууралуу 24.kg агенттигине укук коргоо органдарындагы өздүк булактар билдирди.
Журналист полиция кызматкерлеринин коштоосунда аэропортко жеткирилгени такталган. Айрым маалыматтарга караганда, Бишкек-Москва каттамындагы учак саат 20.00дө учуп кеткен.
Социалдык тармактарда Болот Темировду лифттен алып чыгып, күч менен алып бара жаткан видеосу жарыяланды.
Срочно❗️❗️ Болота Темирова вывели 6 мужчин в гражданском из пункта милиции в аэропорту «Манас». Ранее правоохранители сообщали адвокатам Темирова, что его там нет.
Болота Темирова сейчас ведут на таможенный контроль, чтобы, возможно, депортировать ближайшим рейсом в Москву. pic.twitter.com/LbEr8sZbFN
— Kloop (@kloopnews) November 23, 2022
Буга чейин журналист Темировдун жок болуп жатканы туурасында маалымат тараган.
Эске сала кетсек, бүгүн, 23-ноябрда Бишкек шаардык сотунда журналист Болот Темировдун иши боюнча апелляциялык арыз каралып, сот журналистти өлкөдөн чыгаруу чечимин чыгарган.
Соттун чечиминен кийин милиция кызматкерлери Болот Темировду залдан күчтөп чыгарып кетишти.
Эскерте кетсек, Буга чейин Свердлов райондук соту Болот Темировду «баңгизатты мыйзамсыз даярдоо», «чек араны мыйзамсыз кесип өтүү» иштери боюнча актаган. Ал эми «документти жасалмалоо» иши боюнча Темиров жарым-жартылай күнөөлүү деп табылып, бирок иштин мөөнөтү өтүп кеткенине байланыштуу ага жаза берилген эмес.
Быйыл 22-январда милиция атайын багыттагы кызматкерлердин коштоосунда Болот Темировдун кеңсесине барып, аны «баңгизатты мыйзамсыз даярдоого» шектеп кармап кеткен. Ошондой эле «баңгизат» ишине байланыштуу Темиров менен иштешкен төкмө акын Болот Назаров да кармалган. Бирок коомчулуктун сынынан кийин алар эч жакка кетпөө тилкаты менен кое берилген.
Кийинчерээк Темировго «чек араны мыйзамсыз кесип өтүү» жана «документтерди жасалмалоо» беренелери боюнча иштер ачылган.
Болот Темиров өзүнө козголгон кылмыш иштерин журналисттик ишине байланыштырып, сөз эркиндигине кысым катары баалап келет. Себеби ал жетектеген «Ютубдагы» Temirov LIVE каналы бийлик, анын ичинде УКМКнын төрагасы Камчыбек Ташиевдин туугандарына байланыштуу иликтөөлөдү жасап келген. Темиров кармалар алдында, 20-январда Temirov LIVE’дын командасы «Эки күндө 37 млн сомду кантип тапса болот? Садыр Жапаров жана Ташиевдердин схемасы» аталышындагы иликтөөсүн чыгарган.
Temirov LIVE командасы жасаган ар бир иликтөө чоң резонанс жаратып, иликтөөдө аты аталган адамдар коомчулуктун сынына кабылып келет.
Телеграм каналыбызга каттала кетиңиз
