Жогорку Кеңешке Министрлер кабинети менен Тоголез Республикасынын өкмөтүнүн ортосунда инвестицияларды колдоо жана өз ара коргоо тууралуу макулдашуунун долбоору макулдашууга киргизилди. Документ эл аралык иштер, коргонуу, коопсуздук жана миграция боюнча профильдик комитеттин жыйынында депутаттар тарабынан жактырылды.

Улуттук инвестициялар агенттигинин төрагасынын орун басары Мээримбек Койчуманов түшүндүргөндөй, макулдашуу рамкалык мүнөзгө ээ болуп, келечектеги инвестициялык кызматташтык үчүн негизги шарттарды түзүүгө багытталган.

«Стабилизациялык режим деген түшүнүк бар. Биз аны алдын ала киргизгибиз келет, инвесторлор келген учурда эки мамлекеттин ортосунда түшүнүктүү жана корголгон шарттар буга чейин эле болушу үчүн», — деди ал.

Анын айтымында, сөз бизнес үчүн алдын ала макулдашылган эрежелерди түзүү тууралуу болуп жатат. Бул тобокелчиликтерди азайтып, өлкөнүн инвестициялык жагымдуулугун жогорулатат. Ошондой эле ал Того негизинен кофе, какао жана пахта экспорттой турганын кошумчалады.

Макулдашуунун негизги максаты — эки өлкөнүн инвесторлорун коргой турган укуктук базаны түзүү жана түз инвестициялардын агымын көбөйтүү. Документте бир катар негизги кепилдиктер каралган: инвесторлорго тең жана басмырлоосуз мамиле кылуу, мүлктү мажбурлап алуу учурларында коргоо, ошондой эле талаш-тартыштарды эл аралык арбитраж аркылуу чечүү мүмкүнчүлүгү.

Мындан тышкары, макулдашууда каражаттарды которуу, салыктык жөнгө салуу жана мамлекет менен инвестор ортосундагы талаштарды чечүү тартиби да жөнгө салынат.

Ошол эле учурда ар бир тарап улуттук мыйзамдардын негизинде экономиканын айрым сезимтал тармактарын аныктап, аларга карата чектөөлөрдү киргизүү укугун сактап калат.

Бул макулдашуунун кабыл алынышы инвестиция салуу үчүн туруктуу жана түшүнүктүү шарттарды түзүп, чет элдик инвесторлор үчүн кошумча ишеним сигналын берет деп күтүлүүдө.