Бишкек мэри Айбек Жунушалиев таштандыны кайра иштетүүчү завод 1-декабрдан тарта электр энергиясын жалпы тармакка бере баштаарын билдирди. Бул тууралуу ал пресс-конференцияда айтты.

Анын айтымында, завод борборду электр энергиясы менен камсыздоого даяр, бирок жогорку жүктөм убактары үчүн кошумча кубаттуулуктар керек болууда.

“1-декабрдан баштап биздин таштанды кайра иштетүүчү завод электр энергиясынын алгачкы көлөмдөрүн тармакка бере баштайт. Бул маселенин чечилишинде негизги ролду электр энергиясын өндүрүүчү базаны түзүү ойнойт. Энергетика министрлиги бул багытта чоң иштерди жүргүзүп жатат”, — деди мэр.

Жунушалиевдин айтымында, завод азыр суткасына 850дөн 1 200 тоннага чейин таштанды кабыл алат.