2025-жылы Кыргызстандын президенттик фондунун чыгымдары дээрлик 2,7 млрд сомду түздү. Каражаттын басымдуу бөлүгү социалдык объектилерди көрктөндүрүүгө жана курулушка багытталган. Мындай маалыматтар 2025-жылдагы мамлекеттик бюджеттин аткарылышы жөнүндө отчетто келтирилген.

Алгач бюджетте президенттин фондуна 4 млрд 619,3 млн сом каралган. Жыл ичинде мамлекет башчысынын тескемелерине ылайык фонддон 4 млрд 337,7 млн сом бөлүнгөн.

Бул сумманын 1 млрд 659,9 млн сому түздөн-түз каржылоо жерлери боюнча, дагы 2 млрд 677,8 млн сому Президенттин иш башкармасы аркылуу бөлүнгөн. Документте дал ушул акыркы сумма 2025-жылдагы фонддун чыгымдарынын иш жүзүндөгү аткарылышы катары көрсөтүлгөн.

Бул каражаттын негизги бөлүгү — 2 млрд 574,7 млн сом — социалдык объектилерди көрктөндүрүүгө жана курулушка жумшалган. Бул фонддун иш жүзүндө аткарылган чыгымдарынын 96 пайыздан ашыгын түзөт.

Мындан тышкары, 63,7 млн сом спорттук, маданий-массалык жана башка иш-чараларды каржылык колдоого, 26,8 млн сом ар кандай уюмдардын материалдык-техникалык базасын чыңдоого, 12,6 млн сом жарандарга материалдык жардам көрсөтүүгө багытталган.

Отчетто фонддон жардам кимдерге жана кандай максаттарга берилгени да көрсөтүлгөн. Каражаттар жарандардын дарылануусуна, оор турмуштук кырдаалга кабылган адамдарга, аз камсыз болгон үй-бүлөлөргө жана өзгөчө кырдаалдарда каза болгондордун үй-бүлөлөрүнө жардам көрсөтүүгө багытталган.

Мындан тышкары, фонддун каражаттары Улуу Ата Мекендик согуштун ардагерлеринин айрым категорияларына бир жолку акчалай жөлөкпул төлөөгө, социалдык стационардык мекемелерге жардам берүүгө, жогорку көрсөткүчтөргө жетишкен кыргызстандык спортчуларды сыйлоого, ошондой эле уюмдар үчүн зарыл жабдууларды сатып алууга жумшалган.

Ошентип, 2025-жылы президенттин фондунун сметасында каралган 4,6 млрд сомдун ичинен документте көрсөтүлгөн иш жүзүндөгү чыгымдар 2,7 млрд сомго жакын сумманы түзгөн.