Жалал-Абад облустук соту кош бойлуу аялын өз жанын кыюуга жеткирген деп айыпталган күйөөсү менен анын көңүлдөшүн актаган өкүм чыгарды. Бул тууралуу “Акыйкат” укук коргоо уюмунун юристтери билдиришти.
Маалым болгондой, облустук соттун чечими менен кош бойлуу аялы — 1997-жылы туулган Саламатты (аты-жөндөрү өзгөртүлдү) өз өмүрүнө кол салууга жеткирген деп айыпталган 32 жаштагы Замирбекти 2023-жылдын 2-июнунда акталган. Буга чейин биринчи инстанция Замирбекти сегиз жылга эркинен ажыраткан, бирок экинчи инстанциядагы сот бул өкүмдү жокко чыгарды. Облустук сот Замирбектин 43 жаштагы жеңеси — Наргизаны да актады.
Күбөлөрдүн көрсөтмөсүнө караганда, Замирбек менен Наргизанын ортосунда интимдик мамилелери болгон, бул Саламаттын өз жанын кыюусуна себеп болгон.
Каза болгон Саламаттын жана анын жакындарынын кызыкчылыгын “Адилет” укук коргоо уюмунун адвокаты Равшан Абдуллаев коргоп келет.
Бул окуя 2015-жылы Наргизанын жолдошу каза болгондон кийин башталган. Маркумдун бир тууган аниси Замирбек 2017-жылы Саламатка баш кошкон. Алардын беш жашар кызы бар. Үй-бүлөнүн жакындарынан алынган маалыматка караганда, Замирбек маркум агасынын жубайы Наргиза менен жакын мамиледе болгон. Анын үстүнө Замирбек агасынын көзү тирүү кезинде жеңеси Наргиза менен мамиле куруп жүргөнүн күбөлөр айтышкан. Мындан улам үй-бүлөдө дайыма чыр-чатактар чыгып турган. Саламат мындай кордуктарга чыдабай, 2021-жылдын 2-ноябрында сарайда асынып алган. Эксгумацияда аялдын кош бойлуу экени аныкталган.
Маркум келиндин жакындары айыпталуучу жоопкерчиликке тартылышы керек деп эсептешет. Далил катары Саламат өз жанын кыйганга чейин жазып кеткен катта анын өлүмүнө экөөнү тең катыштыгы бар экени көрсөтүлүп турат. Катта Саламат аларды күнөөлүү деп атап, анын мындай кадамга баруусуна алар тарабынан болгон дайыма кысым көрсөтүү жана кемсинтүү себеп болгонун жазган. Кол жазма экспертизасы жазууну маркум өзү жазганын тастыктаган.
Замирбекке, андан кийин Наргизага Кылмыш-жаза кодексинин 128-берененин 3-бөлүгүнүн «Өзүн-өзү өлтүрүүгө жеткирүү», «Адамдын өмүрүнө жана ден соолугуна коркунучтуу зомбулук көрсөтүү, ырайымсыз мамиле кылуу же жеке кадыр-баркын кемсинтүү» беренелери менен айып тагылган.
Саламаттын жакындары облустук соттун чечимине нараазычылыгын билдиришип, Жогорку сотко кассациялык арыз менен кайрылышмакчы.
Биздин Телеграм каналга катталыңыз
