Агартуу министрлиги билим берүү уюмдарында ар кандай мыйзамсыз акча чогултууга катуу тыюу салынганын эскертти.

Маалыматка ылайык, мамлекеттик жана муниципалдык бала бакчалардын жана мектептердин мугалимдери жана башка кызматкерлери, ата-энелер, коомдук фонддордун жана башка уюмдардын жетекчилери тарабынан ар кандай мыйзамсыз акча чогултууга катуу тыюу салынат.

“Бул талапты бузуу күнөөлүү жактарды жоопкерчиликке тартууга алып келет. Мындай фактылар аныкталган учурда ата-энелер жана мыйзамдуу өкүлдөр дароо укук коргоо органдарына кайрылууга милдеттүү”,- деп билдирди министрлик.

Бул тыюу салуу төмөнкү мыйзамдарда каралган:

• Административдик укук бузуулар жөнүндө кодекси;
• Президенттин 2023-жылдын 26-майындагы «Балдарга акысыз мектептик билим алуу укугун камсыз кылуунун мамлекеттик кепилдиктерин жүзөгө ашыруу чаралары жөнүндө» №136 жарлыгы;
• Билим берүү жана илим министрлигинин 2023-жылдын 1-июнундагы «Кыргыз Республикасынын мамлекеттик жана муниципалдык орто билим берүү уюмдарында мыйзамсыз акча чогултууга тыюу салуу жөнүндө» №3363/1 буйругу.