Бүгүн саат 13:57де Бишкектин аймагында жана жакынкы аймактарда жер титирөө катталды. Өлкөнүн башкы сейсмологу Канат Абдрахматов билдиргендей, очогу Бишкектен 20 чакырым чыгышта, күчү 4,5 балл болгон. Бишкекте титирөө 3-4 балл күчүндө сезилди.

Абдрахматовдун айтымында, жердин титирегени башкача сезилген:

“Силкинүүнүн очогу 15-20 чакырым тереңдикте жайгашып, бизге жакын болгондуктан тик толкундуу болгондой сезилди. Азырынча кайталанышы мүмкүн деген маалымат жок, бирок майда афтершоктор болушу ыктымал,” — деди башкы сейсмолог.

Сейсмология институту азыр тактоо иштерин жүргүзүп жатат. Жарандарга имараттардан алыс болуу жана коопсуз жайларга көчүү сунушталат.