Президент Садыр Жапаров үч жашка чейинки бардык балдарга ай сайын бериле турган “Бала ырысы” аттуу жаңы мамлекеттик жөлөк пулду киргизүү тууралуу жарлыкка кол койду.

Төлөмдөрдүн тартиби:

• Жөлөкпул 2026-жылдын 1-июлунан тартып бериле баштайт.
• Төлөмдүн көлөмү ай сайын 1200 сомду түзөт.
• Жөлөкпул үй-бүлөнүн кирешесине карабастан, үч жашка чейинки ар бир балага берилет.

Президент бул чечим мамлекеттик жөлөкпулдар системасындагы бюрократиялык тоскоолдуктарды жоюу жана баланын өнүгүүсүнүн алгачкы жылдарында үй-бүлөлөргө кепилденген жардам көрсөтүү максатында кабыл алынганын билдирди. Министрлер Кабинетине жаңы жөлөкпулду киргизүү тартибин иштеп чыгуу тапшырылды.

Бул чара балдар арасындагы жакырчылыктын деңгээлин азайтууга багытталган. Улуттук статистика комитетинин маалыматына ылайык, учурда Кыргызстанда үч жашка чейинки 445 миңдей бала бар. Документ расмий жарыяланган күндөн тартып күчүнө кирет.