Айыл чарба министрлигинде министрдин орун басары Рустам Балтабаевдин төрагалыгы алдында «100 өнөр жай ишканасы — 2026» долбоорунун алкагында үстүбүздөгү жылы ачылышы пландалган ишканалардын өкүлдөрү менен жумушчу жолугушуу өттү. Долбоор Министрлер Кабинетинин Төрагасы Адылбек Касымалиевдин 2026-жылдын 19-февралындагы тапшырмасы менен бекитилген.

Жолугушууда долбоорлорду ишке ашыруунун учурдагы абалы, өндүрүштүк аянтчаларды даярдоо, инфратүзүм менен камсыздоо жана мамлекеттик колдоо чаралары талкууланды.

2026-жылы ишке киргизүү пландалган ишканалардын катарында төмөнкүлөр бар:

• суткасына 15 тонна продукция чыгарууга кубаттуулугу жеткен жана 60 жумушчу орунга эсептелген «Обидфайз» ЖЧКсынын сүт өндүрүшү;
• жылына 5 000 тонна продукция чыгарган жана 700 жумушчу орду бар «Барбол» кондитердик фабрикасы;
• кубаттуулугу 1 800 тоннаны түзгөн мөмө-жемиш жана желек (ягода) өсүмдүктөрүн кайра иштетүүчү цех;
• мрамор жана акиташ ташын кайра иштетүүчү эки ишкана — «Эко Стоун» ЖЧКсы жана Жалал-Абад облусундагы «Тойбос» филиалы;
• 2 000 тоннага ылайыкталган муниципалдык картошка сактоочу жай;
• «Адис нан» ЖЧКсынын нан бышыруучу жайы (наабайканасы);
• «Кыргыз Агрохолдинг» ЖАКтын «Асыл Тери» ЖЧКсы менен биргеликтеги булгаары заводу;
• 40 жумушчу орду бар «Три Т» канаттуулар заводу;
• 60 жумушчу орундуу «Орион Экстра» ЖЧКсынын ун чыгаруучу ишканасы;
• 150 жумушчу орунга эсептелген «Ак-Суу асыл тукум чарбасы» ЖЧКсынын канаттуулар фабрикасы;
• 200 жумушчу орду бар «Радуга корм» ЖЧКсынын тоют өндүрүшү.

Жолугушуунун жыйынтыгы менен долбоорлорду ишке ашырууну тездетүү жана мамлекеттик органдар менен өз ара аракеттенүүнү координациялоо боюнча тапшырмалар берилди.