Чүй облусунда адам өлтүрүүгө шектүү жаран кармалды. Бул тууралуу облустук милициянын басма сөз кызматы билдирди.
Маалыматка караганда, 2022-жылдын 21-ноябрында Ысык-Ата районунун Таш-Башат айылынын аймагында, денесинде ар кандай жаракаттары бар, жерге көмүлгөн, болжол менен 45-50 жаштагы белгисиз адамдын сөөгү табылган.
Соттук-медициналык эксперттин катышуусу менен өлүктү кароо учурунда, ал бычактан көптөгөн жаракат алгандыгы аныкталган.
Бул фактыга байланыштуу Кылмыш кодексинин 122-беренеси (адам өлтүрүү) боюнча кылмыш иши козголгон.
Бир катар ыкчам-тергөө иш-чараларынын жүрүшүндө маркумдун өздүгү такталып, ал 48 жаштагы Д.К. аттуу жаран экендиги аныкталган. Ал Бишкектин Октябрь райондук милициясы тарабынан 2022-жылдын 18-октябрынан бери дайынсыз жоголгон жаран экендиги такталган.
«Чүй облустук милициясынын Кылмыш иликтөө башкармалыгы жана Тергөө кызматы, ошондой эле Ысык-Ата райондук милициясынын кызматкерлери тарабынан узак мөөнөттө жүргүзүлгөн комплекстүү ыкчам-тергөө иш-чараларынын натыйжасында бул кылмыш ишине шектүү катары 25 жаштагы Б.Т. аттуу жаран кармалган», — деп айтылат маалыматта.
Учурда шектүү убактылуу кармоочу жайга камакка алынган.
Тергөөнүн жүрүшүндө бул кылмыш мүлк талашуудан улам келип чыкканы аныкталган. Тергөө уланууда.
Биздин Телеграм каналга катталыңыз
