Агартуу министрлиги жаңы бала бакчаларды жана мектептерди долбоорлоодо заманбап эл аралык стандарттарды эске алууга чакырууда. Бул тууралуу Жогорку Кеңештин комитет жыйынында Агартуу министринин орун басары Надира Жусупбекова билдирди.

Анын айтымында, министрлик курулуш тармагындагы мамлекеттик органдарга билим берүү мекемелерин куруудагы мамилени жаңылоо зарылдыгын бир нече жолу көтөрүп келген.

«Биз дүйнөдөгү эң мыкты тажрыйбаларды чогултуп, Курулуш министрлигине сунуштарды жөнөтүп жатабыз. Долбоорлоочулар мектептер менен бала бакчалардын долбоорлорун иштеп чыгууда заманбап талаптарды сөзсүз эске алышы керек», — деди Жусупбекова.

Ал белгилегендей, бул маселе боюнча эки министрликтин өкүлдөрү үзгүлтүксүз жолугушууларды өткөрүп турушат. Кезектеги талкуу өткөн жумада болгон.

Министрдин орун басарынын айтымында, бүгүнкү күндө дүйнөнүн көптөгөн өлкөлөрүндө бала бакчалар менен мектептердин ички мейкиндигин уюштурууга болгон мамиле өзгөрүүдө. Билим берүү мекемелери мүмкүнчүлүгү чектелген балдар үчүн гана эмес, бардык балдар үчүн ыңгайлуу болушу керек.

«Бизге ачык, заманбап жана көп функционалдуу мейкиндиктер керек. Булар эски стандарттардагыдай жабык бөлмөлөрдөн жана тар жайлардан турбашы керек», — деп баса белгиледи Жусупбекова.

Ал ошондой эле билим берүү объектилерин курууга карата талаптарды жана ченемдерди өркүндөтүү боюнча иштер туруктуу негизде жүргүзүлүп жатканын айтты. Ошол эле учурда Агартуу министрлиги балдар үчүн заманбап жана жеткиликтүү шарттарды түзүү маселесинде депутаттардын колдоосуна үмүт артарын белгиледи.