Чүй облусунун Кемин районунда ак илбирсти сактоого жана экологиялык билим берүүнү өнүктүрүүгө арналган «Ак илбирс ЭкоФест 2026» экологиялык фестивалы өттү. Бул тууралуу Кыргызстандын президентинин басма сөз кызматы билдирди.

Маалыматка ылайык, фестиваль Президенттин Администрациясынын, Жаратылыш ресурстары, экология жана техникалык көзөмөл министрлигинин жана Кемин райондук мамлекеттик администрациясынын колдоосу менен «Илбирс – Жашыл муун» коомдук фонду тарабынан уюштурулду.

Иш-чарага президенттин тоо күн тартиби боюнча атайын өкүлү Динара Кемелова, Туризмди өнүктүрүү боюнча мамлекеттик агенттиктин директору Эдуард Кубатов, БУУнун Кыргызстандагы туруктуу координатору Антье Граве, мамлекеттик органдардын, илимий чөйрөнүн, коомдук уюмдардын өкүлдөрү, жаштар жана жергиликтүү тургундар катышты.

Фестивалдын ачылышында сүйлөгөн сөзүндө Динара Кемелова президенттин жарлыгы менен ак илбирс Кыргызстандын улуттук символу катары аныкталганын жана ал тоо экосистемаларынын абалынын маанилүү индикатору экенин белгиледи. Ошондой эле ал 2023–2027-жылдарга карата тоолуу аймактарды өнүктүрүү боюнча беш жылдык иш-аракеттердин ишке ашырылышы жана 2027-жылы өтө турган «Бишкек+25» экинчи Глобалдык тоо саммитине даярдыктар тууралуу айтып берди. Анын айтымында, саммиттин күндөрүнүн бири Эл аралык ак илбирс күнүнө арналат.

Фестивалдын алкагында экологиялык маданиятты жайылтууга жана жаратылышка аяр мамиле жасоого багытталган арт-зоналар, кол өнөрчүлөрдүн көргөзмөлөрү, мастер-класстар, сынактар, спорттук мелдештер жана маданий программалар уюштурулду.