Кыргызстандын Саламаттыкты сактоо министрлиги жана «ВТБ Медицина» АКы кызматташтык жөнүндө меморандумга кол коюшат. Ал биргелешкен долбоорлорду өнүктүрүүнү, заманбап медициналык технологияларды, телемедицинаны киргизүүнү жана жогорку технологиялык медициналык жардамды уюштурууну карайт.

Документ биргелешкен долбоорлорду жана демилгелерди ишке ашырууну, кесиптик тажрыйба алмашууну, медициналык билим берүүнү өнүктүрүүнү, медициналык кадрларды даярдоону өркүндөтүүнү, заманбап медициналык технологияларды, санариптик саламаттыкты сактоону, телемедицинаны жана өз ара кызыкчылык туудурган башка багыттарды киргизүүнү камтыйт.

«ВТБ Медицина» АКы Орусиянын алдыңкы мамлекеттик жана жеке клиникаларында жогорку технологиялык дарылоону уюштуруу боюнча бирдиктүү оператор катары чыгат.

Орусиялык жана кыргызстандык дарыгерлердин ортосунда алдыңкы тажрыйба алмашуу үчүн медицинанын ар кандай багыттары боюнча биргелешкен эксперттик топтор түзүлөт.

Мындан тышкары, КР Саламаттыкты сактоо министрлиги менен биргеликте экинчи медициналык корутунду алуу үчүн платформа түзүү пландалууда, анда Кыргызстандын жана Орусиянын алдыңкы адистери эксперт катары иштешет.

Кызматташтыктын дагы бир багыты медициналык туризмди өнүктүрүү болот. Орусиялык кардарлар үчүн Ысык-Көлдүн жээгиндеги ден соолукту чыңдоочу жайларда санаторий-курорттук дарылоо боюнча топтомдук сунуштарды иштеп чыгуу пландалууда.