2026-жылдын башынан бери аймактык иш менен камсыз кылуу кызматтарынын көмөгү менен 7 106 жумушсуз жаран ишке орношту. Бул тууралуу Эмгек, социалдык камсыздоо жана миграция министрлиги билдирди.

Министрликтин маалыматына ылайык, иш менен камсыз кылуу кызматтарында 60 585 жумушсуз жана жумуш издеген жаран каттоодо турган. Алардын 34 317си жаштар. Расмий жумушсуз макамын 37 886 адам алган.

1-июлга карата иш берүүчүлөр иш менен камсыз кылуу кызматтарына 16 106 бош жумуш ордун сунушташкан. Алардын басымдуу бөлүгү жумушчу кесиптерге туура келет. Учурда алардын ичинен 8 450 бош жумуш орду дагы эле толуктала элек.

Мындан тышкары, 3 451 жумушсуз жаран кесиптик окутууга, кайра даярдоого жана квалификациясын жогорулатууга жөнөтүлгөн. Окутуу ашпозчу, тигүүчү, 1С программасын билген бухгалтер, чач тарач, автоэлектрик, компьютер оңдоо боюнча адис, электр-газ ширетүүчү, сантехник, косметолог, массажист, дизайнер жана башка суроо-талап жогору болгон кесиптер боюнча уюштурулган.

Убактылуу иш менен камсыз кылуу программаларынын алкагында 9 669 жаран акы төлөнүүчү коомдук иштерге жөнөтүлгөн.

Жыл башынан бери иш менен камсыз кылуу кызматтарына ар кандай маселелер боюнча 77 551 жаран кайрылган. Алардын 52,8 миңден ашыгы жумушка орношуу, эмгек мыйзамдары, кесиптик окутуу жана кесип тандоо боюнча консультация алышкан.

Министрлик иш менен камсыз кылуу кызматтары акысыз көрсөтүлөрүн эскертти. Жарандар жумушсуз катары катталып, бош жумуш орундарын тандоодо жардам алып, кесиптик окуудан өтүп, акы төлөнүүчү коомдук иштерге катышып же «Жаштар практикасы» программасынан пайдалана алышат.