Өзбекстандын президенти Шавкат Мирзиёев 9-мартта министрлер кабинетинин төрагасы, Кыргызстандын президентинин аппаратынын жетекчиси Акылбек Жапаровду кабыл алганын Өзбекстандын президентинин маалымат кызматы билдирди.
Жолугушууда ушул жылдын январь айында Бишкекте жетишилген макулдашууларды иш жүзүндө ишке ашыруу маселелери каралды.
Өзбек-кыргыз ар тараптуу стратегиялык өнөктөштүк мамилелерин мындан ары тереңдетүүгө, экономика, соода, энергетика, транспорт жана логистика жаатындагы кызматташтыкты кеңейтүүгө, ошондой эле аймактар аралык байланыштарды жана маданий-гуманитардык алмашууну арттырууга өзгөчө көңүл бурулду.
Автоунаа өнөр жайындагы кооперация долбоорлорун тез арада ишке ашыруунун, биргелешкен текстиль кластерлерин түзүүнүн, электр приборлорун өндүрүүнүн, ошондой эле пайдалуу кендерди биргелешип иштетүүнүн маанилүүлүгү баса белгиленди.
Жолугушууда Камбар-Ата ГЭС-1ди биргелешип куруунун практикалык аспектилери талкууланды. Кытай — Кыргызстан — Өзбекстан темир жол долбоорун активдүү даярдоо зарылчылыгы баса белгиленди.
Ушул жылы парламенттердин, өкмөттөрдүн, эксперттердин, коомчулуктун жана жаштардын деңгээлинде эки өлкөнүн көп кырдуу кызматташтыгын тереңдетүүгө багытталган бир катар биргелешкен иш-чараларды активдүү өткөрүү пландалып жатканы айтылды.
Ошондой эле аймактык кызматташтыктын актуалдуу аспектилери боюнча пикир алмашуу болду.
Акылбек Жапаров ошондой эле Кыргызстандын президенти Садыр Жапаровдун мамлекет башчысына саламын айтты.
Биздин Телеграм каналга катталыңыз
