Кыргыз Республикасынын Министрлер кабинетинин төрагасы Адылбек Касымалиев Ысык-Көл облусуна болгон жумушчу сапарынын алкагында Балыкчы шаардык жалпы дарыгерлик практика борборуна (ЖДПБ) барды.

Министрлер кабинети билдиргендей, Касымалиев медициналык мекеменин абалы, бейтаптарды кабыл алуу шарттары, көрсөтүлгөн кызматтардын сапаты, ошондой эле борбордун кадрлар жана керектүү жабдуулар менен камсыз болушу менен таанышты.

Сапардын жүрүшүндө ал оорукананын алдында ачылган жаңы кардиология бөлүмүнүн ишине өзгөчө көңүл бурду.

Бул бөлүм академик М. Миррахимов атындагы Улуттук кардиология жана терапия борборунун түзүмдүк бөлүмү болуп саналат жана жергиликтүү деңгээлде жүрөк-кан тамыр оорулары менен жабыркаган бейтаптарга диагностика жүргүзүүгө, дарылоого, ошондой эле ыкчам жардам көрсөтүүгө мүмкүндүк берери белгиленди.

ЖДПБны карап чыгуу учурунда ага мекеменин инфратүзүмдүк көйгөйлөрү тууралуу да маалымат берилди — оорукананын негизги имараты канааттандырарлык эмес абалда.

Иш сапардын жыйынтыгында Касымалиев Саламаттык сактоо министрлигине, Архитектура министрлигине жана жергиликтүү бийлик органдарына шаардык оорукананын жаңы заманбап имаратын куруу боюнча деталдуу финансы-экономикалык эсептөөлөрдү ыкчам тартипте жүргүзүүнү тапшырды.