Санкт-Петербургдагы А. Ф. Можайский атындагы Аскердик-космостук академияда билим алып жаткан кыргызстандык курсанттар күжүрмөн камсыздоонун айрым түрлөрү жана тактикалык медицина боюнча олимпиадада ийгиликтүү катышты. Бул тууралуу КР Коргоо министрлигинен билдиришти.

Маалыматка ылайык, биринчи этап 24-майда академиянын факультеттеринин жана бөлүктөрүнүн командалары арасында, ал эми экинчи этап эртеси күнү жогорку аскердик окуу жайлардын командаларынын катышуусунда академиянын полигонунда өттү.

Мелдештин жүрүшүндө кыргызстандык курсанттар даярдыктын жогорку деңгээлин, күжүрмөн чеберчилигин, командалык духун жана биримдигин көрсөтүшүп, мунун аркасында жогорку натыйжаларга жетише алышты.

Олимпиаданын жыйынтыгы боюнча Кыргызстандын курсанттары төмөнкү орундарды ээлешти:

— академиянын командаларынын арасында радиациялык, химиялык жана биологиялык коргонуу боюнча «Коопсуз чөйрө» сынагында 1-орунду;

— жогорку аскердик окуу жайлардын арасындагы олимпиаданын жалпы командалык эсебинде 1-орунду.