Бишкек шаарынын Ленин районунда Ала-Арча дарыясынын нугун тазалоо иштеринин биринчи этабы аяктады. Бул тууралуу шаар мэриясы билдирди.

Маалыматка ылайык, бул этапта Алтымышев көчөсүндөгү мыйзамсыз курулуштар демонтаждалып, дарыяга тоскоолдуксуз кирүү жана авариялык-куткаруу иштерин жүргүзүүгө шарт түзүлгөн.

Жалпысынан 1 миң 420 чарчы метр муниципалдык жер тазаланган. Демонтаждалган объекттерге төмөнкүлөр кирет:

• 2 жеңил объект;
• 2 күркө;
• 2 контейнер;
• 80 чарчы метр чатыр;
• 4 туруктуу объект (анын ичинде химиялык тазалоочу жана сулуулук салону);
• 12 чарбалык имараттар;
• 9 туруктуу тосмолор.

Ошондой эле жер мыйзамдарын бузган 5 адамга жалпы 150 миң сом айып салынган.