Ош облусунун Араван районунда газоблок заводу курулуп жатат. Бул тууралуу президенттин аталган облустагы өкүлчүлүгү билдирди.

Маалыматка ылайык, долбоор 4,82 гектар аянтты ээлейт жана сметалык баасы 1 миллиард сомду түзөт.

Ишкана жылына 300 миң куб метр газоблок өндүрүүгө эсептелген. Өндүрүш үчүн чийки заттын 90%ы Кыргызстандын түштүк аймагындагы кендерден алынат. Ошондой эле завод ишке кирсе 70 жумуш орду түзүлөт.

Ишкананы пайдаланууга берүү 2026-жылдын аягына пландалган. Эсептөөлөр боюнча, заводдон бюджетке жылына 200 миллион сом өлчөмүндө салык жана социалдык төлөмдөр түшөт.