Жалал-Абаддын Таш-Көмүр шаарындагы «Капитальная» көпүрөсү туристтик объектиге айландырылат. Бул тууралуу Курулуш министрлиги билдирди.

Маалыматка ылайык, бул көпүрө мурда көмүр ташуу үчүн колдонулуп, Советтер Союзу тарагандан бери пайдаланылбай келген. Шаардын туристтик дараметин арттыруу максатында 1,96 гектар аянтты ээлеген бул аймакты заманбап эс алуу жайына айландыруу сунушталууда. Учурда анын эскиздик долбоору даярдалды.

Долбоорго ылайык, аймакта ресторан, панорамалык «A-frame» үйлөрү жана эс алуу аллеясы жайгаштыруу каралган. Учурда эскиздик долбоор жергиликтүү мамлекеттик органдардын кароосуна жөнөтүлгөн.