Кыргызстандык студенттер Астрахань мамлекеттик университетиндеги билим алуу тажрыйбалары менен бөлүштү. Алар студенттик жашоо жана Россиянын түштүгүндөгү эң жылуу жана кооз шаарлардын биринде болуунун өзгөчөлүктөрү тууралуу айтып беришти.
Василий Татищев атындагы Астрахань мамлекеттик университети 1932-жылы негизделген жана бүгүнкү күндө Россиянын түштүгүндөгү алдыңкы билим берүү, илимий жана маданий борборлордун бири болуп саналат. Бул жерде студенттер экономика, укук, маалымат технологиялары, табигый илимдер жана педагогика сыяктуу тармактарда жогорку акы төлөнүүчү адистиктерге ээ боло алышат.
Университет гуманитардык, табигый илимдер, технология, айыл чарба жана педагогика боюнча ар кандай билим берүү багыттарын сунуш кылган төрт институтту жана 16 факультетти камтыйт. Университеттин күчтүү жактарынын бири анын тил программасы: ар бир студент жок дегенде бир чет тилин тереңдетип окуйт жана университет 15 түрдүү тилде курстарды сунуштайт. Эл аралык өнөктөштүктүн аркасында студенттер чет өлкөлүк университеттерде жана дүйнөнүн алдыңкы компанияларында стажировкадан өтүү мүмкүнчүлүгүнө ээ.
Студенттер ошондой эле дипломуна европалык тиркеме — DIPLOMA SUPPLEMENT алышат. Бул алардын билиминин бүткүл дүйнөгө таанылышын камсыз кылат.
Студенттердин бири Шохзодмирзо Авилов университеттеги жашоосу тууралуу өз таасирлери менен бөлүштү: «Астрахань мамлекеттик университети көптөгөн мүмкүнчүлүктөрдү түзүп, студенттердин чыгармачылык жактан өсүшүнө түрткү берет. Бул жерде сиз окуп эле тим болбостон, дүйнөнүн булуң-бурчунан жаңы досторду табасыз. Мен алган тажрыйба, укмуштуудай позитивдүү болду».
Сабактар заманбап окуу корпустарында өткөрүлөт, университет чет элдик студенттер үчүн ыңгайлуу жатакана менен камсыз кылат. Мындан тышкары университеттин өзүнүн спорттук базалары, анын ичинде бассейн жана машыгуу залдары бар.
Чет элдик студенттердин адаптацияланышына университет тарабынан колдоо көрсөтүү программасы көмөктөшөт. Университеттин адистери, ошондой эле студенттер жана жердештер жаңы студенттерге жаңы шарттарга көнүүгө, документтерди даярдоого жана күнүмдүк маселелерди чечүүгө жардам беришет.
Дагы бир маанилүү жагдай — Астрахандагы көп улуттуу маанай. Шаарда 200дөн ашык улуттун өкүлдөрү жашайт жана университетте 45тен ашык өлкөдөн келген студенттер окушат.
Астрахандагы жылдын көпчүлүк бөлүгүндө күн ачык, кышы жумшак болгон климат Кыргызстандан барган студенттер үчүн да ыңгайлуу болот.
Василий Татищев атындагы Астрахань мамлекеттик университети менен Кыргызстандын кызматташтыгы эки тараптуу мамилелердин алкагында да, Евразия экономикалык биримдигинин (ЕАЭБ) жана Шанхай Кызматташтык Уюмунун (ШКУ) алкагында да жигердүү өнүгүүнү улантууда.
«Биз Астрахань мамлекеттик университетинде билим алуу өлкөлөрүбүздүн ортосундагы достук байланыштарды чыңдоого олуттуу кадам болоруна жана кыргызстандык студенттер окуу жайыбызда сапаттуу билим гана албастан, узак мөөнөттүү достук мамилелерге да ээ болоруна ишенебиз», — дейт университеттин ректору Константин Маркелов.
Окуу жайдын жетекчиси Астрахань мамлекеттик университетинде абитуриенттерди кабыл алуу өнөктүгү 20-июндан тарта башталганын кошумчалады. «Биз кыргызстандык абитуриенттер үчүн университетибиздин эшигин зор канааттануу менен ачабыз», — деди Константин Маркелов.
Биздин Телеграм каналга катталыңыз
