.svg){kind=logo}
«Аткаминерлер бири-бирине шылтоодо»: Оштун тургуну үйүнүн жанындагы кооптуу курулушка даттанды
Reporter.kg редакциясына Ош шаарынын тургуну Улугбек Назаров кайрылып, Моминов көчөсү, 1 (мурунку Светлый тар көчөсү) дарегиндеги үйүнүн жанында курулуп жаткан беш кабаттуу имараттагы мүмкүн болгон мыйзам бузуулар тууралуу билдирди.
Назаровдун айтымында, курулуш анын үйүнө өтө жакын жерде жүрүп жатат, ал эми короосуна дайыма курулуш материалдары жана башка буюмдар түшүп турат.
«Үйүмө өтө жакын (кооптуу) аралыкта беш кабаттуу имараттын курулушу жүрүүдө. Курулуштан ар кандай буюмдар: арматура, устундар, бетон сыныктары, мыктар түшүп жатат. КР Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш көзөмөл департаменти (МАККД/ГАСК) куруучуга эскертме жана айып пул жазып берген, бирок эч нерсе өзгөргөн жок», — деди Назаров.
Оштук тургун мамлекеттик органдарга бир нече жолу кайрылганын, бирок маселе ушул күнгө чейин чечиле электигин ырастайт. Анын айтымында, тиешелүү мекемелер «жоопкерчиликти бири-бирине шылтап жатышат».
«Дубалды болжол менен бир метр аралыкта куруп жатышат»
Назаровдун айтымында, ӨКМдин Ош шаары боюнча башкармалыгынын жообунда белгилүү бир шарттарда имараттардын ортосундагы аралык 50%га кыскартылышы мүмкүн экени айтылат.
«Аралыкты сактоо нормативдери бар. Эгерде дубалда терезе жок болсо, аралыкты 50%га, башкача айтканда, үч метрге чейин азайтууга уруксат берилет. Бирок бул жерде үч метр да эмес — дубалды менден болжол менен бир метр эле алыстыкта куруп жатышат», — деди ал.
Назаров белгилегендей, бул норма ал кайрылгандан кийин ӨКМден келген расмий жоопто келтирилген. Ошол эле учурда, оштук тургундун ырастоосунда, мекеменин өкүлдөрү жерине барышкан эмес жана курулуп жаткан объект менен анын үйүнүн ортосундагы иш жүзүндөгү аралыкты текшеришкен эмес.
«ӨКМ мага жөнөткөн катка караганда, эч ким барган эмес. Бир дагы текшерүү болгон жок, болгону МАККДнын өкүлдөрү гана келип, жумуштар коопсуздук техникасынын талаптарын бузуу менен жүрүп жатканын аныкташты», — деп билдирди Назаров.
ӨКМ кандай жооп берди
21-августта ӨКМдин Ош шаары боюнча башкармалыгы арыз ээсине белгилүү бир учурларда курулуш нормалары имараттар менен курулмалардын ортосундагы аралыкты кыскартууга жол берерин билдирген.
«КР Өкмөтүнө караштуу Архитектура, курулуш жана турак жай-коммуналдык чарба мамлекеттик агенттигинин буйругу менен бекитилген КРнын „Шаарларды жана шаар тибиндеги айылдарды пландаштыруу жана куруу“ курулуш нормаларынын 1.3-тиркемесине ылайык, терезеси жок дубалдары бар имараттардын жана курулмалардын ортосундагы аралыкты 50 пайызга кыскартууга уруксат берилет. Ошондой эле, 1.4-тиркемеге ылайык, терезеси жок имараттын дубалы менен өрткө каршы дубалдын ортосундагы аралык чектелбейт (нормалаштырылбайт)», — деп айтылат мекеменин жообунда.
Ошол эле учурда, буга чейин, 3-августта ӨКМ Назаровго «Ош шаары, Моминов көчөсү, №1 дарегиндеги курулуп жаткан беш кабаттуу имараттын долбоордук документтери КР ӨКМнин Ош шаары боюнча башкармалыгынан макулдашуудан өткөн эмес» деп расмий маалымдаган.
Мекеме ага бул маселе боюнча Мамлекеттик архитектура-курулуш көзөмөлүнүн Ош аймактык башкармалыгына кайрылууну сунуштаган.
МАККД мыйзам бузууну аныктап, куруучуга айып салды
КР Курулуш министрлигине караштуу Мамлекеттик архитектура-курулуш көзөмөл департаментинин Ош шаардык башкармалыгы 11-августтагы кат жүзүндөгү жообунда объектти текшерүү учурунда техникалык коопсуздук талаптарын бузуу фактысы аныкталганын билдирген.
«Ош шаары, Моминов көчөсү, №1 дарегинде курулуп жаткан беш кабаттуу объекттин төртүнчү кабатында арматура иштерин жүргүзүүдө техникалык коопсуздук эрежелери сакталбагандыгына байланыштуу, КР Укук бузуулар жөнүндө кодексинин 144-беренесине ылайык айып пул салынды, ошондой эле курулуш нормаларын жана коопсуздук эрежелерин сактоо зарылдыгы тууралуу эскертүү берилди», — деп айтылат башкармалыктын жообунда.
Бирок, Назаровдун айтымында, мындан кийин да курулуш улана берген.
«Мен мекемелерге кат жазып жаткан кезде, куруучу беш кабатты куруп салды»
Назаров прокуратурага да кайрылган. Анын айтымында, кайрылуу Ош шаардык мэриясына жөнөтүлүп, ал жактан МАККДга кайра багытталган. Мекеме мыйзам бузуулар аныкталганын билдирген.
Оштук тургун буга карабастан жумуштар уланып жатканын, ал эми курулуш аянтында керектүү коргоочу конструкциялар жок экенин ырастайт.
«Мамлекеттик органдар көңүл бурбай жатышат, ал эми куруучу курулушту коргоочу шаймандарсыз, торлорсуз эле улантууда. Кум куюлуп, арматура учуп жатат. Кечээ эле мыктар түшүп жаткандыктан, патрулду чакырдым. Алар келип, көрүп, прокуратурага кайрылууну сунушташты. Ош шаарынын мэриясынан мага мектептердин жана бюджеттик курулуштарды гана көзөмөлдөшөрүн, ал эми бул курулуштун аларга тиешеси жок экенин айтышты», — деди Назаров.
Reporter.kg тилчиси комментарий алуу үчүн Ош шаардык мэриясынын басма сөз кызматына кайрылды. Ал жактан жооп берүүгө убада беришкени менен, убада боюнча гана калды.
Сыягы, Сулайман-Тоону ЮНЕСКОнун Дүйнөлүк мурастар тизмесинен чыгарып салуу ыктымалдыгына байланыштуу кырдаал, шаардыктын короосуна арматура, мык, бетон сыныктары учуп түшүп жаткан курулушка караганда муниципалитетти көбүрөөк түйшөлткөн өңдүү.
Reporter.kg кырдаалга көз салууну улантат.
Анара Мамытова
